“ Учууталлар ыллыыллар “

Павловскай орто оскуолатыгар   “Ырыа- олох аргыһа “ диэн девизтээх ырыа күрэҕэ бэрт сэргэхтик  буолан ааста.

 

Павловскайдааҕы кустовой методическай холбоһук учууталларын саҥа оскуолаҕа үөрэ- көтө сахалыы сиэринэн көрүстүлэр.Василий Николаевич Оконешников аатын сүгэр Павловскай орто оскуолатын дириэктэрэ Валерий Валериевич Петров ыалдьыттары эҕэрдэлээн, махтанан тыл эттэ. Саҥа оскуола устун экскурсия тэрилиннэ. 

Павловскай оскуолатыгар “Ыллыыр оскуола“ диэн бырайыак үлэлиир. Автордар: Александра Константиновна Федорова, Светлана Ивановна Торговкина уонна Константин Константинович Лукин. Бу бырайыак чэрчитинэн икки улахан тэрээһин буолан ааспыта. Ону таһынан оскуолабыт 140 сыллаах үбүлүөйүгэр 140 киһилээх хор тахсыбыта. Олохтоох автор, педагогичкскэй үлэ бэтэрээнэ Мотрена Шишигина  “Оскуолабар“ диэн ырыатын оҕолуун – учууталлыын ыллаабыттара. Бу ырыа оскуолабыт гиминэн  бигэргэтилиннэ.

Бырайыак иһинэн   ”Учууталлар ыллыыллар   “ диэн ааттаах   улахан тэрээһиҥҥэ барыта  37 педагог кыттыыны ылла. Дьүүллүүр сүбэҕэ үлэлэстилэр: Хаптаҕай орто оскуолатын учуутала Мария Андреевна Терентьева, Павловскай орто оскуолатын музыкальнай куруһуок  салайааччыта Устинья Семеновна Саввина, Россолода орто оскуолатын учуутала Инга Викторовна Попова.

Ырыа куттаах учууталларбыт  биллэр- көстөр мелодистар уостан түспэт ырыаларын  , саха эстрадатын сулустарын  репертуардарыттан толордулар.

Ырыа күрэҕэр соло, дуэт, трио, квартет уонна ансамбль диэн көрүҥнэринэн түмүк таҕыста. Солоҕо лауреат үрдүк аатын ыллылар  Хаптаҕай оскуолатын музыкаҕа учуутала Мария Васильева “Илиибин уунабын эйиэхэ”  уонна Россолода оскуолатын учуутала Анжелика Иовлева  Сайсары Куо репертуарыттан “Аар хатыҥ” ырыаларынан. Дуэтка бастыҥнарынан ааттаннылар Мария Васильева уонна  Николай Парфенов “Эн ырыаҥ “  ырыанан. Триоҕа лауреат аатын ыллылар Павловскай оскуолатыттан “Музабар “ диэн Василиса Макарова ырыатын толорооччулар. Квартетынан толорууга кыайыылааҕынан таҕыстылар Павловскай оскуолатын эдэр учууталлара “Чугдаар , чуораанчыгым” ырыаны толорон. Ансамбылынан толорууга лауреат аатын ылла Хаптаҕай орто оскуолатын дьахталларын ансаамбыла “Күөрэгэйдиин көрсүһүү “ ырыанан.

Уопсайа 16 наҕараада туттарылынна . Бииртэн биир сэргэх нүөмэрдэри көрдөрбүт коллегаларбыт дипломант ааттарын ыллылар. Кырдьык даҕаны, учууталлар олус талааннаахтарын көрөн мустубут дьон сөхтүбүт- махтайдыбыт. Ырыа күрэҕэ” Ырыам –эн ” диэн уопсай ырыанан түмүктэннэ.Ырыа күрэҕин иилээн- саҕалаан оскуола учууталлара Надежда Дмитриевна Бурнашшева уонна Эдуард Егорович Федоров ыыттылар.

Салҕыы кустовой меотодическай холбоһук эдэр учууталларыгар  саҥа спортивнай саалга “Көрдөөх күрэхтэр” ыытылыннылар.

Павловскайдааҕы кустовой методическай холбоһук учууталларын  саҥа үүммүт сыл бастакы ситиһиилэринэн буолар - улуустааҕы үөрэх тэрилтэлэрин спартакиадатыгар кыайыылара.Түмсүүлээх холбоһук инникитин үлэҕэ, спортка , араас тэрээһиннэргэ өссө көхтөөх, түмсүүлээх буолуохтара диэн эрэнэбит.

“ Ыллыыр оскуола” бырайыак салҕыы айанныыр...

 

   Юлия Егоровна Колосова 

Оставить комментарий

Комментарии: 0