Спорт сылыгар -  «Эрэл» спортивнай стадион

Балаҕан ыйын 8 күнүгэр Павловскай орто оскуолатыгар ураты суолталаах күн үүннэ -  саҥа спортивнай площадка  ситэн-хотон үлэҕэ кииирдэ. Аныгылыы тутуулаах стадион арыллыытыгар нэһилиэк дьоно-сэргэтэ, оҕолор, ыҥырыылаах ыалдьыттар тоҕуоруһа муһуннулар.

 

Аалай лиэнтэни кырыйалларыгар чиэс бэрилиннэ оскуола бастыҥ спортсменыгар, буулдьанан ытыыга 1 спортивнай разрядтаах республика хамаандатын чилиэнигэр, улуус, өрөспүүбүлүкэ чемпионугар, Кушнарева Дианаҕа,  оскуола директорыгар Петров Валерий Валерьевичкэ уонна  “Электромонтаж” ХЭТ салайааччытыгар Пинигин Василий Иннокентьевичкэ.

 Оскуолабыт чиэһин араас таһымнаах күрэхтэһиилэргэ ситиһиилээхтик кыттар спортсмен үөрэнээччилэр уонна кинилэри дьаныардаахтык бэлэмниир оскуолабыт фикультураҕа учууталлара, тренердэрэ парадтаан киирдилэр. Үөрүүлээх быраааһынньыгы үөрэнээччилэр уонна учууталлар кыттыылаах  спортивнай үҥкүүлэр, флешмоб киэргэттилэр. Нэһилиэкпит аҕа баһылыга Федоров Николай Гаврильевич эҕэрдэлээн тыл эттэ уонна быйылгы  “Азия оҕолоро”  оонньууларга ситиһиилээхтик кыттыбыт оскуолабыт үөрэнээччилэригэр, Капитонов Кириллгэ, Оконешников Егорга уонна    Тимофеев Толяҕа                  махтал суруктары уонна өйдөбүнньүк бэлэхтэри туттарда. Оскуола директора Петров Валерий Валерьевич тупсаҕай көстүүлээх спортивнай площадканы туппут “Электромонтаж”  тэрилтэ үлэһиттэригэр анаан махтал тылларын тириэртэ. Улуус дьаһалтатыттан Находкин Андрей Михайлович, Захаров Константин Анатольевич эҕэрдэ тылларын чуолаан оҕолорго  туһаайан этттилэр. Саҥа спортивнай площадкаттан саҥа ситиһиилэр, саҥа эрэллэр тахса турдуннар диэн алгыстарын анаатылар.

 “Электромонтаж” ХЭТ салайааччыта Пинигин Василий Иннокентьевич эҕэрдэлээн туран оскуолаҕа саҥа мээчиктэри бэлэх уунна. Оскуола бэтэрээнэ, муҥутуур үрдүк категориялаах физкультура учуутала Давид Гаврильевич Торговкин үөрүүлээх түгэнинэн эҕэрдэлээн туран үөрэнээччилэр чөл олоҕу тутуһан мэлдьи спордунан дьарыктана туруохтарын баҕа санаатын тириэртэ.

Бу күн саҥа площадкаҕа мини-футболга уонна волейболга табаарыстыы көрсүһүүлэр ыытылыннылар. Барыта 4 хамаанда кыттыыны ылла. Ол курдук нэһилиэк ыччаттара, ыалдьыттар ( Элетромонтаж ХЭТ), оскуола учууталлара уонна үөрэнээччилэр сборнай хамаандалара күөн көрүстүлэр.

 Уопсай түмүккэ   1-2 миэстэлэри үллэһиннилэр “Элетромонтаж” ХЭТ уонна Нөөрүктээйи нэһилиэгин ыччаттарын хамаандалара. 3-с миэстэҕэ таҕыста оскуола үлэһиттэрин хамаандата.

Бу күн оҕолорго аналлаах араас хайысхалаах күрэхтэри учууталлар тэрийэн ыыттылар: парковай ориентирование, “Безопасное колесо”  велогонка,  “О, спорт, ты - мир” асфальга уруһуй күрэҕэ, “В поисках сокровищ” квест- оонньуу.

Оскуолабыт саҥа спортивнай площадкатыгар  үөрэнээччилэрбит утумнаахтык дьарыктанан спорт үрдүк чыпчаалыгар тахсыахтара диэн эрэллээхпит.

 

      Юлия Колосова , Павловскай

Оставить комментарий

Комментарии: 0