Собо киэһэтэ

Павловскай орто оскуолатыгар иккис сылын Байанай ыйыгар аналлаах собо киэһэтэ диэн бырааһынньык ыытылынна. Сэтинньи 10 күнүгэр 5 “а”, 7 “а”, “б” кылаас оҕолоругар Арчы дьиэтигэр дьоро киэһэ буолан ааста. Бу тэрээһини иилээн-саҕалаан ыыттылар Арчы дьиэтин дириэктэрэ Аммосова Марфа Васильевна, учууталларбыт Пудова Светлана Дмитриевна, Федорова Любовь Васильевна,  Петрова Сардана Егоровна. Ыалдьыттарынан буоллулар: Петр Петрович, Галина Васильевна Егоровтар уонна төрөппүттэр. “Кыыс ийэтинээн” диэн ааттаах күрэх буолла.  Онно 3 дьиэ-кэргэн кыттыыны ылла. Биһиги онно ийэлэрбитин кытта собо хатырыктаатыбыт уонна үөстээтибит. Ол кэннэ соболорбутун буһардыбыт. Конкурс түмүгүнэн “Түргэн-тарҕан туттунуулаах хаһаайкалар” Аина уонна Саргылана Владимировна Сивцевалар, “Ыраас туттунуулаах хаһаайкалар”  Туяра , Анастасия Ивановна Винокуровалар,  “Иллээх асчыттар” Аиза, Наталья Дмитриевна  Брызгаловтар  анал ааттар хаһаайкаларынан таҕыстылар. 

Соботтон араас бүлүүдэлэри астаан кэлэн оҕолор быыстапкаҕа кытыннылар. Саамай улахан собо диэн анал ааты Аиза Брызгалова ылла.

Оҕолор сүрдээх элбэх интэриэһинэй кэпсээннэри иһиттибит, таабырыннары таайдыбыт, бултааһын үгэстэрин биллибит. Уолаттар муҥха туһунан Петр Петрович кэпсээбитин , балыксыт алгыһын сэргэээн иһиттилэр. Галина Васильевна балыкка сыһыаннаах тыллар суолталарын туһунан оонньуу ыытта.

Бу тэрээһинтэн биһиги собо сахаларга былыр-былыргыттан сүрүн ас буоларын биллибит. Собоҕо анаан Дьокуускайга памятник туруорбуттарын биллибит. Түмүгэр биһиги бары собо минин, соботтон араас бүлүүдэлэри  амсайдыбыт. Үгүс дьоҥҥо балыктааһын айылҕалыын алтыһан, туһалаах сынньалаҥ буоларын биллибит.

 

Аиза Брызгалова, Павловскай орто оскуолатын 5 кылаас үөрэнээччитэ.

Оставить комментарий

Комментарии: 0