Нөөрүктээйи киинэ сылын түмүктүүр

Ахсынньы 14 күнүгэр Нөөрүктээйигэ Россияҕа киинэ сылын түмүктүүр киинэ фестивала буолан ааста. Бу тэрээһини олохтоох телестудия уонна оскуола телестудиятын салайааччыта Колосова Юлия Егоровна, оператор Семен Павлов уонна култуура киинин специалистара тэрийэн ыыттылар. 

Нэһилиэккэ маннык фестиваль саҥа ыытыллар. Онтон оскуолабытыгар 4 сыл устата  "Мир через объектив" диэн ааттаах киинэ фестивала ыытыллан кэллэ.

Маны барытын учууталбыт Юлия Егоровна салайан ыытар. Сыллата оҥорбут киинэлэрбит элбээн иһэллэр. Улууска, республикаҕа тиийэ куонкурстарга кыттабыт. Быйылгы сылга уһуллубут документальнай киинэлэри , “Мүчүк “ диэн ааттаах оҕолор тэттик киинэлэрин , “Биһиги дьиэ кэргэммит дьарыга”  диэн ааттаах роликтары дьүүллүүр сүбэ эрдэ көрбүтэ. Ол кэннэ 10 анал номинацияларынан түмүк тахсыбыта.

Киинэ фестивалын өрөгөй түһүмэҕин олохтоох кулууп эдэр специалиһа Марфа Дмитриева ыытта.

Быйыл  "Мэҥэ киинэ" диэн улууска ыытыллыбыт фестивалга кыттыыны ылбыппыт. Онно эдэр ыччаттар “Дьиҥнээх дьахтар” диэн уһулбут киинэлэрэ бастыҥ киинэлэргэ ааттаммыта. Киинэ ааптара -  Егорова Татыйык, сүрүн оруолга Сардана Старостина  оонньообут.

Быйыл саас оскуолабытыгар “Алгысфильм” кэлэн биир нэдиэлэ устата  баҕалаах оҕолору мунньан "Таҥха" диэн киинэ устубуппут. Киинэҕэ уһуллубуппун олус астыммытым. Ол иһин сайын киинэ лааҕырыгар оскуолабытыттан иккиэ буолан Прокопьев Павликтыын сылдьыбыппыт. Онно 20 күн устата   "Пионер түүлэ" киинэ устубуппут. Мин сүрүн оруолу оонньообутум.

Республиканскай "Золотой олень" диэн киинэ фестивалыгар кыттыбыппыт иһин махтал суругунан наҕраадаламмыппыт.

Киинэ фестивалбыт саҕаланыытыгар  быйылгы сылга ситиһиилээх уонна бастыҥ    тэттик киинэлэр, нэһилиэккэ уһуллубут документальнай киинэлэр, дьиэ кэргэн  роликтара көрдөрүлүннүлэр.

Онтон бастыҥнары наҕараадалыыр чаас буолла. Дьүүллүүр сүбэ наҕараадалары туттарда. Анал ааттар хаһаайыттарынан ааттаннылар :

1."Нөөрүктээйи киинэ"- "Дьиҥнээх дьахтар" ( Егорова Татыйык)

2. "Бастыҥ Мүчүк" – “Тоҕо”   - 3б кыл. ( кыл. Сал. Капитонова Н.Ф.)

3. "Бастыҥ  документальнай  киинэ" -  "Кырдьаҕас оскуола аанын сэгэтэн..."

( режиссер- Ю.Е. Колосова )                      

4. "Бастыҥ  улахан киһи оруола"   -  Оконешникова Людмила Кирсановна

5. "Бастыҥ уол оҕо оруола" -  Пак Артур ( 2 кыл.)

6. "Бастыҥ  кыыс оҕо оруола" - Капитонова Айыына ( 3 кыл.)

7. "Бастыҥ режиссер" - Колосова Ю.Е.

8  "Бастыҥ  оператор" -  Семен Павлов

9. "Эдэр оператор" - Прокопьев Павлик ( 6 кыл.)

10."Бастыҥ дьиэ  кэргэн   ролига" - Тимофеевтар

Олохтоох администрация  нэһилиэккэ киинэ сайдарыгар көмөлөспүт дьоннорго махтал суруктары туттарда.

Фестиваль бүтүүтэ быйылгы сылга уһуллубут бары киинэлэри көрүү буолла.

Олус сэргэх тэрээһин буолла. Эһиилги сылга өссө элбэх киинэ уһуллуон уонна  Нөөрүктээйигэ киинэ фестивала салҕыы ыытыллыан баҕарабын.

 

     Дьулуур Огонеров, 8 кылаас.

Оставить комментарий

Комментарии: 0