“Сырдык иэйиим” сүрэхтэннэ

Павловскай орто оскуолатыгар ыам ыйын 3 күнүгэр 8а кылаас үөрэнээччитэ Огонеров Дьулуур- Дьулурҕа хоһооннорун хомуурунньугун сүрэхтэниитэ буолла. Сырдык иэйиим диэн ааттаах кыракый кинигэни кытта билсээри поэзияны сэҥээрээччи үөрэнээччилэр уонна улахан дьон муһуннулар. 

Дьулуур кыра сааһыттан остуоруйалары айар, хоһооннору суруйар. Бастаан куобах туһунан остуоруйа суруйбут эбит. Күн бүгүн Дьулуур 1000 кэриҥэ хоһооннордоох, 270 рэп ырыа тыллардаах, 20- чэ кэпсээннээх, 7 үгэлээх, 20-чэ хоһоонунан кэпсээннээх. Эдэр автор бэйэтин хоһооннорунан улууска эрэ буолбатах, өрөспүүбүлүкэҕэ эмиэ билиннэ.Ол курдук улууска тахсыбыт “ Кистэлэҥ иэйиилэр”   диэн кинигэҕэ биһиги нэһилиэктэн 5 суруйааччы айымньылара киирбиттэр:  Николай Карпов, Егор Самсонов, Василиса Маакрова , Александра Попова уонна Дьулуур Огонеров.

Дьулуур хоһоонноро ураты стиллээхтэр. Хоһооннорун араас тиэмэҕэ суруйар : төрөөбүт дойду, айылҕа, таптал, анабыл хоһооннор.

Дьулуур икки хоһоонугар Гаврил Дохунаев – Толлуман уонна Александр Никифоров –Black MC  рэп ырыа буоллулар.

Кинигэ сүрэхтэниитигэр Дьулуур кылааһын оҕолоро Нөөрүктээйим диэн хоһоонун ааҕан иһитиннэрдилэр.

Бу дьоро киэһэ Дьулуурга анаан алгыс бастыҥын анаатылар . Эдэр кэскиллээх ыччаппыт айылҕаттан бэриллибит талаанын салҕыы сайыннара турарыгар баҕа санааларын эттилэр.

 

Колосова Ю.Е.

Оставить комментарий

Комментарии: 0